غزل
ساگر تیمی
خرچ کرتے ہو کم تو ہوگا ہی
باپ ہے اس کو غم تو ہوگا ہی
اس کی صورت ہے مومنوں والی

اس کی تھیلی میں بم تو ہوگا ہی !
ایک پیسہ ہے اور پھر شہرت
ایسی صورت میں " ہم " تو ہوگا ہی
آپ چاہيں کہیں نہيں اپنا
خاندانی ہے ضم تو ہوگا ہی
ایک مدت سے دل میں رہتے تھے
اب بچھڑتے ہو نم تو ہوگا ہی
چاہے جتنا اکڑ کے چلتا ہو
اس کے آگے وہ خم تو ہوگا ہی
ایک مدت ہوئي ہے لڑتے ہوئے
ہار جانے پہ غم تو ہوگا ہی
پڑھ کے کہتا ہے میری تحریریں
ساگر تیمی ہے دم تو ہوگا ہی

Top of Form