غزل

ساگرتیمی

فضا مسکرائے ، مکاں مسکرائے

جو دل صاف ہو تو جہاں مسکرائے

محبت ہو دل میں ، مدلل ہوں باتیں

تو حضرت کا سارا بیاں مسکرائے

اگر راہ حق میں اٹھاؤ ضرر تو

نفع خوب ہو اور زیاں مسکرائے

محبت کا قصہ مزہ دے گیا کیا ؟

اجی پیر صاحب ، جواں مسکرائے

خدا کے کہے پر چلے گر یہ دنیا

تو ہر سمت امن و اماں مسکرائے

تلاوت کلام خدا کی ہوعادت

تو ایمان دل میں نہاں مسکرائے

عجب چیز ہے مسکراہٹ بھی ساگر

جو تم مسکراؤ ، جہاں مسکرائے