سیتامڑھی کی ایک شام کے ایک خوبصورت منظر اور دلفریب یاد کے نام

ایک نشیلی شام

ہوائیں تیز تھیں زلفوں کا شوخ بکھرا تھا

وہ مست مست نگاہوں کا نور نکھرا تھا

وہ اس کا رنگ تو آنکھوں سے تھا عیاں لیکن

گلابی ہونٹ تھے موہ لیتا ہوا مکھڑا تھا

وہ میری آنکھوں میں اس کا وہ گہر بار کنول

مچلتے دریا پر مانو گلاب بکھرا تھا

وہ ناز و شوخ سے آنا اور پھر چلے جانا

نشیلی شام تھی وہ چاند کا اک ٹکڑا تھا

غضب کا حسن تھا اس کے کتابی چہرے پر

دوچار تل بھی تھے مالی کا سخت پہرا تھا

بدن میں آیا تھا اس سے میرے عجیب نشاط

اور اس کے جانے پر ہر سو لگا کہ کہرا تھا

حسیں رخسار پہ اشکوں کی وہ حسین لری

کھلے گلاب پہ شبنم کا چند قطرہ تھا

وہ اس کا کھیلنا گڑیوں کے ساتھ مل مل کر

چمکتے تاروں میں وہ ایک چاند ابھرا تھا

 دل میں اس کے بھی تھا کچھ نہ کچھ چھپا لیکن

خموش نینوں سے واضح سجن کا دکھڑا تھا

وہ چلتی ایسے تھی جیسے کہ بڑھ رہی ہو لپٹ

عجیب جوش تھا مانو جوان بگڑا تھا

نگاہ گاڑ کر ہنستی تھی اور روتی تھی

دل ودماغ کے مابین جاری جھگڑا تھا

وہ خواب تھا کہ حقیقت تھی کچھ نہیں معلوم

کھلی جو آنکھ تو ساگر کا رنگ اترا تھا

غزل

 

آج کل پریشاں ہیں زندگی کے پیمانے

زاھد مکرم ابھی آرہے ہیں میخانے

الفت و محبت بھی، نفرت و عداوت بھی

اس عجیب دنیا میں کون کس کو پہچانے

سنیے تو یہ لگتا ہے ایک ہی کہانی ہے

قصہ مختلف ہیں اور ہیں الگ یہ افسانے

کچھ نیا بنائینگے روپ اس محبت کا

عشق کرنے والوں کو ہم کہینگے فرزانے

عشق پر بھی قبضہ ہے ان دنوں سیاست کا

اب سوال اٹھتا ہے کیا کرینگے دیوانے

الجھنوں سے ابھرونگا، دور ہوگی بیماری

ایک باروہ آکر بیٹھے میرے سرہانے

زندگی ہی بے حس ہے شمع کیا کرے ساگر

بے وجہ محبت میں مر رہے ہیں پروانے

 

میری پیاس تھوڑی بہت ہی بڑھی تو ہے

ساقی شراب کھانے میں مے کی کمی تو ہے

چادر نے ڈھانپ لی تو ہے اس سر کو بہت خوب

لیکن ہماری پنڈلی اب بھی کھلی تو ہے

تم کو امیر وقت کی دعوت ہو مبارک

روٹی غریب کھانے میں سوکھی ہوئی تو ہے

موسی کو مارنے کا پھر حربہ نہ چل سکا

فرعون کی تقدیر بھی پھوٹی ہوئی تو ہے

شب پھر کسی کی موت کی پیغامبر ہوئی

اور صبح کی کرن بھی دھندلی ہوئی تو ہے

ظالم بھی خوش ہے اور ہمیں بھی ہے یہ سکوں

گردن وفا کی راہ میں اپنی کٹی تو ہے

ساگر غریب لوگوں کا رہبر ہوں اس لیے

اپنی امیر لوگوں سے اب بھی ٹھنی تو ہے

 

 

 

بسم اللہ الرحمن الرحیم

غزل

ساگر تیمی

میری چاہت میرے الفاظ کی قیمت دے دے

مجھ سے نفرت ہے تو واپس وہ محبت دے دے

یہ بلندی ، میرے  قد کو  گھٹاتی  ہے  بہت

میں نے کب تم سے کہا تھا مجھے عزت دےدے

اب کہ مانگوں تو یہ مانگوں کہ مجھے دے پستی

تیرے  اوپر ہے  خدایا  کہ تو شوکت  دے دے

ہر سطح پرہے یہاں  بغض ،حسد، نفرت کا  چلن

کیا  یہ ممکن  نہیں اللہ  ، تو  الفت  دے دے

مجھ کو معلوم ہے صورت ہے  بنائی  تیری

رب کعبہ مجھے اک اچھی سی سیرت دے دے

جھوٹ کہتا ہوں  تو کرتا ہے  ملامت یہ  ضمیر

سچ کے کہنے کی خدایا مجھے ہمت دے دے

یہ  غریبی  بھی  تو  ایمان  کی  سوداگر  ہے

تو کیا اب بھی کہوں تجھ سے کہ دولت دے دے

تیرا  ساگر  کہ  رہ حق   کا  ہے  جویا  ،  اللہ

تو  اسے  راہ  وفا ، ذوق  عبادت  دے  دے

 

 

غزل

کوئی جو آکے نگاہوں کے در میں رہتا ہے

نہ جانے کیسا نشہ اپنے سر میں رہتا ہے

جو ہونے والا ہے ہوگا بدل نہیں سکتا

تو کیا وجہ ہے تو خوف وڈر میں رہتا ہے

تمہیں بھی عشق میں دیکھونگا تو بھی میرے بعد

کدھر کوجاتا ہے اور کس کےگھر میں رہتا ہے

اسے بھی میری طرح ساتھ کی ضرورت ہے

ادھورا   آدمی   تنہا  سفر  میں  رہتا  ہے

کٹھن حالات میں دنیا سمجھ میں اور آئی

مزہ سفینے کا اصلا بھنور میں رہتا ہے

پجاری رات کے جانیں تو کس طرح جانیں

وہ نور جو کہ طلوع سحر میں رہتا ہے

خیال چھوڑ دو ساگر کی ہمسری کا کہ وہ

کھڑا کنارے پہ موج دگر میں رہتا ہے

بسم اللہ الرحمن الرحیم

"سو چوہے کھاکر بلی چلی حج کو"

اڈوانی کو سیکولرزم کی یاد آئی

ثناءاللہ صادق تیمی

،236،پیریار ہاسٹل،جے این یو،نئی دہلی 110067

Mob:09013588985

sagartaimi@gmail.com

بھارتی جنتا پارٹی کے اندر لال کرشن اڈوانی کی چاہے جو بھی حیثیت ہو،یہ بات تو بہرحال معلوم حقیقت ہے کہ اس پارٹی کو چوٹی تک پہنچانے والوں میں سب سے اہم نام لال کرشن اڈوانی ہی کا ہے۔ لوک سبھا کے اندر دو سیٹوں پر جیتنے والی پارٹی یکایک مرکز میں حکومت کی کامیاب دعویداری پیش کرے تو اسے ایک چمتکار ہی کہا جائیگا اور یہ چمتکار بھارتی جنتاپارٹی نے لال کرشن اڈوانی کے بل بوتے کر دکھلایا۔ اڈوانی جی کی رتھ یاترا نے پورے دیش میں بھگوا آتنک کو جس طرح پھیلایا، وہ کوئ چھپا ہوا معاملہ نہیں ہے۔ یہ اڈوانی جی ہی تھے جن کی گمراہ کن سرگرمیوں اور اشتعال انگیزیوں کی وجہ سےبابری مسجد شہید کی گئی۔ پورے ملک میں مسلمان اپنے آپ کو ڈرا ہوا محسوس کرنے لگا اور اسے لگا کہ اسکا وجود خطرے میں ہے۔

اٹل بہاری واجپئ کی قیادت میں جب بھارتی جنتا پارٹی کی حکومت بنی اور وزارت داحخلہ کا قلمدان لال کرشن اڈوانی کے ہاتھ میں آیا تو ہندوستانی مسلمانوں پرقیامت ٹوٹ پڑی۔ یکساں سول کوڈ کے نفاذ کا معاملہ ابھرا،مدارس کو دہشت گرد گرداناگیا، نصاب تعلیم کو زعفرانی رنگ میں رنگا گیا اور گجرات کے اندر قتل وخون کا ننگا ناچ کھیلا گيا اور یہ دھمکی دی گئ کہ یہی تجربہ پورے ہندوستان میں دہرایا جائیگا۔ وہ تو بھارتی جنتا پارٹی کی بد قسمتی کہیے کہ 2004 میں feel good factor اور India shining کے نعروں کے باوجود اس کا پتہ صاف ہو گیا اور حکومت کی دیوی کانگریس پر مہربان ہوگئی۔ ظاہر ہیکہ اس میں مسلم ووٹ کا ناقابل انکار اورزبردست کردار تھا۔2009 میں بھی ایسا ہی ہوا بلکہ کانگریس کچھ زیادہ ہی مضبوطی سے آگے بڑھی اور بھارتی جنتا پارٹی کے سر کا درد مزید بڑھ گیا۔

اب 2014 کے الیکشن کی تیاری ہے۔ کرپشن کا دیو بھی بھارتی جنتا پارٹی کے لیے کچھ بہتر خبر لیکر نہیں آیا ہے۔ ایسے میں ظاہر ہیکہ کچھ نہ کچھ بدلاؤ لانے کا تو سوچنا ہی ہوگا۔ مسلم ووٹ کو کانگریس سے الگ کرنے کے لیے اڈوانی جی کئ ہتھیار آزما رہے ہیں۔ ایک وقت میں انہونے یہ شوشہ چھوڑا کہ اس مرتبہ مرکز میں غیر کانگریسی اور غیر بی جے پی حکومت بنیگی۔ اس کا بنیادی مقصد یہ تھا کہ مسلمان کانگریس کو کمزور سمجھ کر کسی اور کو ووٹ دیں اور اس کا لازمی فائدہ بھارتی جنتا پارٹی کو ملے۔ لیکن اڈوانی جی کے اچھے دن نہیں چل رہے ہیں، ان کا یہ منتر خود ان کی پارٹی کو پھوٹی آنکھ نہیں بھایا اور بیچارے چوطرفہ تنقید کی زد میں آگئے۔ اڈوانی جی نے پھر اپنے آپ کو تیار کیا اور پارٹی ورکرس کو یہ قیمتی مشورہ دیا کہ وہ خود کو سیکولر ثابت کریں ،دوسری سیکولر پارٹیوں سے اپنا رشتہ مضبوط کریں، اقلیت (مسلمانوں)کو یہ باور کرائیں کہ وہ ان کے دشمن نہیں ہیں۔ اس معاملے میں نتن گڈکری نے بھی ان کا ساتھ دیا اور ہزاروں مسلمانوں کے قاتل نریندر مودی بھی مشورہ کو عملی جامہ پہنانے میں لگ گئے۔ نتن گڈکری نے تو کلدیپ نیر سے بات کرتے ہوے دہشت گردی کے الزام میں مسلم نوجوانوں کی گرفتاری پر کانگریس کو برا بھلا بھی کہا اور کہا کہ اس سے ایک خاص طبقے کے اندر غلط پیغام جائیگآ۔

یعنی ہر طرح سے یہ کوشش کی گئی اور کی جارہی ہیکہ کسی بھی طرح مسلمانوں کو رجھایا جاسکے۔ لیکن سوال یہ ہیکہ کیا ہندوستانی مسلمان اتنا نادان اور کوتاہ فہم ہے؟ کیا اسے اتنا بھی شعور نہیں ہیکہ وہ دوست اور دشمن میں تمیز کر سکے۔ حالانکہ اڈوانی جی کہ مشورہ کو ایک آزمودہ کار انسان اور ایک تجربہ کار سیاستداں کی دور بینی اور سیاسی شعور کے طور پر بھی دیکھا جاسکتا ہے۔ عین ممکن ہیکہ تجربات نے اڈوانی کو یہ سکھلادیا ہوکہ ہندوستان میں بھگوا انتہا پسندی کے ساتھ اقتدار اعلی تک رسائی آسان نہیں اور وہ خلوص کے ساتھ اپنی پارٹی کو سیکولر شبیہ دینا چاہ رہے ہوں ۔ لیکن جناب عالی! خمیر تو نہیں بدلیگا ، ذہنیت تو تبدیل نہیں ہوگی ۔ اقتدار کے حصول کے لیے وقتی سمجھوتہ اقتدار پاتے ہی ختم ہو جائیگآ اور وہی رنگ عود کر آئیگا۔  اڈوانی جی! غلط راستہ اپنا کر اچھی منزل تک پہنچنے کا خواب ناتمام رہتا ہے۔ اب اگر آپ کو دیکھ کر کوئ ”سو چوہے کھاکر بلی چلی حج کو" کہے تو اس میں بھلا اس کا قصور ہی کیا ہے؟؟؟

غزل
میرے سب کارنامے ہوا ہو گئے
اہل دستار جب بھی خفا ہو گئے
یہ عجب بات ہے ہم ہی زندہ نہیں
مرنے والے تو مر کر سوا ہو گئے
بے ریا تھی محبت تو یہ بھی ہوا
کپڑے یوسف کے شافی دوا ہو گئے
ماں بھی گھر میں رہی جب توانا رہی
ناتوانی میں بیٹے جدا ہو گئے
یہ عقیدت ہے یا پھر عداوت کوئی
جو نبی تھے وہ کیسے خدا ہو گئے
بات کرنا ہمیں ہی گوارہ نہ تھا
جو خفا تھے خفا سے خفا ہو گئے
میں نے رب پہ بھروسہ کیا جب کبھی
شب گھنیری میں روشن دیا ہو گئے
ساگر کس قید میں تو پڑا رہ گیا
جتنے قیدی تھے سارے رہا ہو گئے
غزل
خدا کی راہ میں یہ زندگی بتاؤ تو
کسی یتیم کے گالوں کو تھپتھپاؤ تو
مٹ ہی جائیگی ہاں یہ تیرگی خدا کی قسم
ذرا کتاب خدا کو گلے لگاؤ تو
چمک ہی جائیگا تیری ترقیوں کا چراغ
یہ شعلہ نفرت ذرا بجھاؤ تو
تم چاند پہ ہو تو پھر اس زمیں پہ آؤگے
ہمیشہ چاند پہ رہ کر ذرا دکھاؤ تو
میں مان لوں کے تیرا مجھ سے رشتہ ہے باقی
میرے فراق میں اک اشک ہی بہاؤ تو
گھٹا بھی چھائی ہے اور وہ بھی آگئے ہیں یہاں
اب ایسے میں ساقی ذرا پلاؤ تو
سنا ہے تیری گلی عشق،وفا ،خوشبو ہے
ہمیں بھی اپنی گلی میں کبھی بلاؤ تو
پہنچ نہ پائے اگر منزل مقصود پہ کہنا
مسلسل راہ میں اپنے قدم بڑھاؤ تو
تمہاری بات بھی سن لیگا کر یقیں ساگر
شب قدر میں کبھی تم اسے بلاؤ تو

غزل
دھرتی پہ آسمان کا سایہ عجیب تھا
جو راہ دے رہا تھا کبھی خود رقیب تھا
پھر رات بھر ہواؤں میں اڑتا رہا خیال
پھر خوشنما محل میں ہمارا حبیب تھا
مرتے ہوے بھی میری ادائیں نہیں گئیں
میں ہنس رہا تھا جب کہ شکستہ صلیب تھا
بیٹی ہوئی تو ماں نے ہی گردن دبا دیا
ممتا تڑپتی رہ گئی منظر مہیب تھا
اک اک صفحہ حیات کا روشن ہے بالیقیں
میرا نہیں، وہ سارے جہاں کا نقیب تھا
جو کچھ ملا اسی پہ قناعت رہی ہمیں
معلوم ہے کہ ابن عبداللہ غریب تھا
سن لی دعا تو مجھ کو تعجب نہیں ہوا
اب بھی مجیب ہے وہی جو کل مجیب تھا
ساگر سے ان کو اتنی شکایت تو رہ گئی
سچ کہ کر رسوا کر دیا جب کہ قریب تھا

Assalamu Alaikum ,Ek Ghazal Hazir e Khidmat hai.

Assalamu Alaikum ,Ek Ghazal Hazir e Khidmat hai.