غزل
اک موڑ پر تم بیٹھو، اک موڑ سنبھالیں ہم
اس طرح سے دنیا کی ، تصویر سدھاریں ہم
اک ہاتھ میں خنجر ہے، اک آنکھ میں آنسو بھی
خنجر کو کریں نابود، آنسو کو مٹائیں ہم
الفت کے پجاری ہم ، وہ ظلم کے ٹھیکیدار
محروم محبت کو، اک جام پلائیں ہم
تم حسن کی ملکہ ہو، میں عشق کا پاگلپن
شیریں کو سنوارو تم، فرہاد بنائیں ہم
اس طرح محبت کی، تعریف رقم ہوگی
اک شعر سناؤ تم ،اک شعر سنائیں ہم
اک روز حقیقت میں، یہ ظلم فنا ہوگا
اس خواب کی اچھی سی، تعبیر نکالیں ہم
اک تیرا تصرف ہے، اک میری ہنرمندی
اک شہر اجاڑو تم، اک شہر بسائیں ہم
اک شخص محبت ہے، اک شخص عداوت بھی
ان دونوں کو آپس میں، کس طرح ملائیں ہم
ساگر کو تلاطم سے ، کچھ فرق نہیں پڑتا
اک جست لگاؤ تم، اک جست لگائیں ہم